Damejakt på ryper

Fyrste helga i oktober arrangerte fylkeslaget til NJFF rypejakt i Aurland.

«Eg takka ja til verv som tillitsvalt i kvinneutvalet i Sogn & Fjordane JFF i 2020», seier Heidi Ryum Marsh. Allereie same haust tok Solveig Kvakestad på Steinbergdalshytta kontakt og spurte om samarbeid. Saman laga dei ei pakke med rypejakt og overnatting.  «I 2021 hadde me 8 plassar tilgjengeleg og fekk 6 deltakarar. Arrangementet vart godt motteke og det var ønskje om å auka tal plassar. No i år var det i utgangspunktet 12, men me fekk auka til 13 då det var stor etterspørsel, også nokon på venteliste.» seier Heidi.

Steinbergdalshytta ligg i Aurland statsallmenning. Fjellstyret vart kontakta for å høyra om det var mogleg å frigjera jaktkort til ordninga. Fjellstyret fatta vedtak om å stilla med kjentmann og jaktkort på småvilt, trass i at det er låge kvoter på rype for tida.

«Grunnlaget for denne type aktivitet er at det skal være eit lågterskel tilbod for å få fleire jenter ut på jakt. Det er gunstig pris for medlemmer i NJFF og ein fin arena for å treffa andre jenter som jaktar», seier Heidi.

Med nysnø på toppane, vekslande nedbør og frisk vind la 14 ivrige kvinner i veg inn i fjellheimen på jakt etter ryper. Etter mange kilometer og høgdemeter i ur og røys, vart resultatet rypeobservasjonar på alle saman. Nokre hol i lufta vart det også. Men for Birgit Schie vart det derimot full klaff.  Etter mykje øving på avstandsmåling i terrenget, og litt treningsskyting på blink, var det ingen nøling då skotsjansen på fjellrypa plutseleg var der. Sjølv om det er bag-limit på ei rype, så er det ingen avgrensing på mengda glede!

Planlegging av neste års program i Sogn og Fjordane JFF er allereie i gang, og Heidi er tydeleg på at ho ønskjer småviltjakt med base i Steinbergdalshytta som ein årleg aktivitet.

«Vi er veldig takknemlege for at Fjellstyret er så positive til dette opplegget», avsluttar Heidi Ryum Marsh.